நீங்கள் தேடியது "பணம் பறிப்பு"

கொடைக்கானல்:

கொடைக்கானலில் ஏராளமான உணவு விடுதிகள் மற்றும் மளிகைக் கடைகள் உள்ளன. கடந்த சில நாட்களாக உணவு விடுதி மற்றும் மளிகைக்கடை உரிமையாளர்களிடம் நான் உணவு பாதுகாப்பு அலுவலர் பேசுகிறேன் என்று கூறி உங்களை எனக்கு நன்றாக தெரியும் என்றும், தான் தற்போது வெளியூரில் இருப்பதாகவும் வாகனத்திற்கு டீசலுக்காக பணம் வேண்டும் என கேட்டு செல்போன் மூலம் பணம் பறிக்கும் செயலில் மர்ம நபர் ஈடுபட்டுள்ளார்.

மேலும் இவரது பேச்சை உண்மை என நம்பி கொடைக்கானலில் 10-க்கும் மேற்பட்ட வணிகர்கள் கூகுல் பே, போன் பே மூலமாக பணம் செலுத்தி ஏமாந்து உள்ளனர்.

மேலும் உணவு பாதுகாப்பு அலுவலர் போன்று பணம் கேட்கும் ஆடியோ தற்போது சமூகவலைத்தளங்களில் வைரலாக பரவி வருகிறது. இதனைத் தொடர்ந்து உணவு பாதுகாப்பு அலுவலர் போன்று போனில் பேசி பணம் கேட்கும் மர்ம நபரிடம் வணிகர்கள் யாரும் பணம் செலுத்தி ஏமாற வேண்டாம் என உணவு பாதுகாப்பு துறை அதிகாரிகள் அறிவுறுத்தியுள்ளனர்.

இந்த மர்ம நபர் தனது செல்போனை பயன்படுத்தினால் சிக்கிக்கொள்வோம் என்பதால் கோயம்புத்தூர், பொள்ளாச்சி பகுதிகளிலுள்ள முன் பின் தெரியாத பெட்டி கடைக்காரர்களிடம் லாவகமாக பேசி அவர்களுடைய கூகுல் பே, போன் பே உள்ள செல்போன் எண்களை வாங்கி நூதனமுறையில் கொடைக்கானல் வணிகர்களிடம் இந்த எண்ணுக்கு பணத்தை அனுப்பும்படி கூறி உள்ளார். பின்னர் பெட்டிக்கடைக்காரர்களிடம் பணத்தை பெற்று மோசடியில் ஈடுபட்டது குறிப்பிடத்தக்கது.

திருச்செந்தூர்:

நாசரேத் அருகே உள்ள அரியான்மொழியைச் சேர்ந்தவர் அந்தோணி பிச்சை. இவரது மகன் வேல்துரை (வயது47). தொழிலதிபர். சென்னையில் சூப்பர் மார்க்கெட் நடத்தி வருகிறார். அதே பகுதியை சேர்ந்தவர் பட்டு மகன் ராஜலிங்கம். இவர் வேல்துரை நடத்தி வரும் சூப்பர் மார்க்கெட்டில் பணியாற்றி வந்தார்.

இந்நிலையில் சூப்பர் மார்க்கெட் பணத்தை கையாடல் செய்ததாக ராஜலிங்கத்தை வேலையை விட்டு நீக்கினார் வேல்துரை. இதனால் வேல்துரை மீது ராஜலிங்கம் மன வருத்தத்தில் இருந்து வந்தார்.

இதற்கிடையே அரியான் மொழியில் தான் கட்டி வரும் வீட்டை பார்ப்பதற்காக சென்னையில் இருந்து ஊருக்கு வந்திருந்தார். சம்பவத்தன்று வீட்டிற்கு பொருட்கள் வாங்குவதற்காக பைக்கில் சென்று கொண்டிருந்தார்.

அச்சம்பாடு அருகே வேல்துரை வந்தபோது ராஜலிங்கம் உட்பட 6 பேர் கும்பல் பைக்கை வழிமறித்தனர். பின்னர் வேல்துரையை தாக்கி அவர் வைத்திருந்த ரூ.1 லட்சம் பணத்தை பறித்துக் கொண்டு தப்பி சென்றனர்.

காயமடைந்த வேல்துரை இதுகுறித்து மெஞ்ஞானபுரம் போலீஸ் நிலையத்தில் புகார் செய்தார். புகாரின் பேரில் ராஜலிங்கம், முத்துலிங்கம், முத்துக்குமார், சரவணகுமார், மற்றொரு ராஜலிங்கம், சித்திரை செல்வம் ஆகிய 6 பேர் மீது போலீசார் வழக்கு பதிவு செய்து தேடி வருகின்றனர்.

போரூர்:

கோயம்பேடு பூ மார்கெட்டில் தங்கி வேலை செய்து வருபவர் முருகன் (48). நேற்று மாலை அவர் பூ மார்கெட்டில் உள்ள கடைக்கு வந்து கொண்டிருந்தார் அப்போது முருகனை வழிமறித்த வாலிபர் பணம் கேட்டு மிரட்டினர். திடீரெனஅவன் முருகனை கத்தியால் வெட்டி பையில் இருந்த பணத்தை பறித்து தப்பி சென்றுவிட்டான்.

கையில் வெட்டு காயமடைந்த முருகன் இதுகுறித்து கோயம்பேடு போலீசில் புகார் அளித்தார் இன்ஸ்பெக்டர் மாதேஸ்வரன் அந்த பகுதியில் இருந்த கண்காணிப்பு கேமராவை ஆய்வு செய்தார்

இதில் வழிப்பறியில் ஈடுபட்டது நெற்குன்றம் சீமாத்தம்மன் நகர் 2வது செக்டாரைச் சேர்ந்த சரண் என்பது தெரிந்தது. மதுரவாயலில் பதுங்கி இருந்த சரணை நேற்று இரவு போலீசார் கைது செய்து புழல் சிறையில் அடைத்தனர். கைதான சரண் ஏற்கனவே கோயம்பேடு பஸ் நிலையம், கோயம்பேடு மார்க்கெட் , மதுரவாயல் உள்ளிட்ட பகுதிகளில் வழிப்பறி கொள்ளையில் ஈடுபட்டு போலீசாரால் கைது செய்யப்பட்டு சிறை சென்று வந்தவன் என்பதும் குறிப்பிடத்தக்கது.

போரூர்:

பூந்தமல்லியை அத்த நசரத்பேட்டை, வரதராஜபுரம் எம்.ஜி.ஆர். தெருவைச் சேர்ந்தவர் ராமதாஸ். கார்பென்டர்.

இவர் நேற்று இரவு பணி முடிந்து மோட்டார் சைக்கிளில் வீடு திரும்பிக் கொண்டிருந்தார். வரும் வழியில் மதுரவாயல் ஏரிக்கரை பஸ் நிறுத்தம் அருகே உள்ள ஏ.டி.எம். மையத்திற்கு சென்று ரூ.35 ஆயிரம் எடுத்தார்.

பின்னர் காரம்பாக்கம் அருகே வந்து கொண்டிருந்த போது 2 மோட்டார் சைக்கிளில் பின் தொடர்ந்து வந்த 7 பேர் கும்பல் திடீரென ராமதாசை வழிமறித்து கத்தியால் சரமாரியாக வெட்டினர்.

அவரிடமிருந்து மோட்டார் சைக்கிள், செல்போன், ரூ.35 ஆயிரம், ஏ.டி.எம். கார்டுகள் ஆகியவற்றை பறித்துகொண்டு தப்பி சென்று விட்டனர்.

கொள்ளையர்கள் வெட்டியதில் தலை மற்றும் வலது கையில் படுகாயமடைந்த ராமதாஸ் பூந்தமல்லி அரசு மருத்துவமனையில் சிகிச்சை பெற்று வருகிறார்.

மதுரவாயல் இன்ஸ்பெகடர் ரவீந்திரன் அந்த பகுதியில் உள்ள கண்காணிப்பு கேமராவை ஆய்வு செய்து விசாரணை நடத்தி வருகிறார். ஏ.டி.எம். மையத்தில் இருந்தே ராமதாசை கொள்ளை கும்பல் நோட்டமிட்டு அவரை தாக்கி கொள்ளையில் ஈடுபட்டு இருக்கலாம் என்று தெரிகிறது.

போரூர்:

மாதவரம் சாத்தங்காடு பகுதியைச் சேர்ந்தவர் குணசேகர். ஆட்டோ டிரைவர். இவர் நேற்று இரவு கோயம்பேடு நூறடி சாலையில் ஆட்டோவில் வந்து கொண்டிருந்தார். அப்போது ஆட்டோவில் ஏறிய 3 பேர் கும்பல் விருகம்பாக்கம் செல்லுமாறு கூறினர். ஆட்டோ சிறிது தூரம் சென்றதும் திடீரென அவர்கள் கத்தியை காட்டி மிரட்டி குணசேகர் பையில் இருந்த ரூ.1000த்தை பறித்து 3 பேரும் தப்பி சென்று விட்டனர்.

இதுகுறித்து கோயம்பேடு பஸ்நிலைய போலீசார் வழக்குப்பதிவு செய்து கோயம்பேடு மார்க்கெட்டில் பதுங்கி இருந்த திருமுல்லை வாயில் பகுதியைச் சேர்ந்த கோபிநாத் என்பவரை கைது செய்தனர். மேலும் தப்பி ஓடிய கூட்டாளிகள் 2 பேரை தேடி வருகின்றனர்.

நாகர்கோவில்:

மார்த்தாண்டம் பாலப்பள்ளம் பகுதியைச் சேர்ந்தவர் ஜெரால்டு சிங்(வயது24). இவர் மார்த்தாண்டம் பகுதியில் உள்ள ஒரு வங்கியில் விற்பனை மேலாளராக பணியாற்றி வருகிறார்.

நேற்று இவர் தனது மோட்டார் சைக்கிளில் மார்த்தாண்டத்தில் இருந்து நல்லூர் சென்று கொண்டிருந்தார். அப்போது நல்லூர் பார்க் அருகே வரும் போது எதிரே மோட்டார் சைக்கிளில் 2 வாலிபர்கள் வந்தனர். அவர்கள் ஜெரால்டு சிங் மோட்டார் சைக்கிளை வழிமறித்து அவரிடம் தகராறில் ஈடுபட்டனர்.

மேலும் அவரது பையில் இருந்த ரூ.800 பணத்தை பறித்தனர். இதனை அவர் தடுத்தார். இதில் ஆத்திரம் அடைந்த வாலிபர்கள் ஜெரால்டை சரமாரியாக தாக்கினார்கள்.

இதில் படுகாயம் அடைந்த ஜெரால்டு சத்தம் போட்டார். அவரது அலறல் சத்தம் கேட்டு அக்கம் பக்கத்தினர் ஓடி வந்தனர். அவர்கள் வருவதை பார்த்ததும் அந்த 2 வாலிபர்கள் ஜெரால்டு சிங்குக்கு கொலை மிரட்டல் விடுத்து விட்டு அங்கிருந்து தப்பிச் சென்று விட்டனர்.

படுகாயம் அடைந்த ஜெரால்டுசிங்கை மீட்டு மார்த்தாண்டத்தில் உள்ள ஒரு தனியார் ஆஸ்பத்திரியில் சிகிச்சைக்காக அனுமதித்தனர். அங்கு அவருக்கு தீவிர சிகிச்சை அளிக்கப்பட்டு வருகிறது.

மேலும் சம்பவம் குறித்து மார்த்தாண்டம் போலீசில் ஜெரால்டு சிங் புகார் செய்தார். புகாரின் பேரில் இன்ஸ்பெக்டர் சொர்ணலதா, சப்-இன்ஸ்பெக்டர் சுந்தரலிங் கம் ஆகியோர் வழக்குபதிவு செய்து விசாரணை நடத்தி வருகின்றனர். மேலும் அந்த பகுதியில் கண்காணிப்பு கேமிராக்கள் ஏதேனும் உள்ளதா? என்பது குறித்தும் விசாரணை நடத்தி வருகின்றனர். ஜெரால்டு சிங் கூறிய அடையாளத்தை வைத்து அந்த பகுதியில் உள்ள சோதனை சாவடிகளில் போலீசார் தீவிர கண்காணிப்பு பணியில் ஈடுபட்டனர்.

தஞ்சாவூர்:

தஞ்சை கோடியம்மன் கோவில் பகுதியை சேர்ந்த தினேஷ் (வயது 16) (பெயர் மாற்றப்பட்டுள்ளது). இவர் தஞ்சையில் உள்ள அரசு பள்ளியில் பிளஸ்-1 படித்து வருகிறான்.

அதேபள்ளியில் திருக்கருக்காவூரை சேர்ந்த ராஜா (17), வளையபேட்டையை சேர்ந்த சரவணன், மாத்தூரை சேர்ந்த சந்திரன், கரந்தட்டான் குடியை சேர்ந்த சுந்தர் (மேலே உள்ள 4 மாணவர்களின் பெயரும் மாற்றப்பட்டுள்ளது) இவர்கள் 4 பேரும் அதே அரசு பள்ளியில் 12-ம் வகுப்பு படித்து வருகின்றனர்.

கடந்த டிசம்பர் 4-ந் தேதி தினேஷ் காலை வழக்கம் போல்பள்ளிக்கு புறப்பட்டு சென்றார். மீண்டும் மாலை வீடு திரும்பவில்லை. தினேசின் தந்தை வெளியூரில் வேலை பார்த்து வந்ததால் அவரது தாய் மகனை பல இடங்களில் தேடி பார்த்தார். ஆனால் காணவில்லை. இதையடுத்து தன்னுடைய கணவருக்கு தகவல் தெரிவித்தார்.

இதையடுத்து ஊருக்கு வந்த தினேசின் தந்தை மாயமான மகனை சில நாட்கள் தேடி அலைந்துள்ளார். ஆனால் மகன் எங்கு சென்றான் என்ற தகவல் கிடைக்காததால் தஞ்சையில் மேற்கு போலீஸ் நிலையத்தில் புகார் செய்தார்.

இந்த நிலையில் போலீசில் புகார் அளித்து நீண்ட நாட்கள் ஆகியும் போலீசார் தினேசை கண்டு பிடிக்க எந்த நடவடிக்கையும் எடுக்கவில்லை என கூறப்படுகிறது.

இதையடுத்து இனி போலீசாரை நம்பி பயன் இல்லை என தன்னுடய மகனை கண்டுபிடிக்க தானே களத்தில் இறங்கி விசாரணையில் இறங்கினார்.

அதன்படி தினேஷ் படித்த அரசு பள்ளிக்கு சென்று பள்ளி தலைமை ஆசிரியரிடம் விசாரணை நடத்தியபோது டிசம்பர் 4-ந் தேதி பள்ளிக்கு வந்த தினேஷ் அதேபள்ளியில் 12-ம் வகுப்பு படித்து வரும் ராஜா, சரவணன், சந்திரன், சுந்தர் ஆகிய 4 மாணவர்களுடன் பள்ளியை விட்டு சென்றது தெரியவந்தது.

இதையடுத்து அந்த 4 மாணவர்களது வீடுகளுக்கும் சென்று தன்னுடைய மகனை எங்கு அழைத்து சென்றீர்கள் என கேட்டுள்ளார். அப்போது தாங்கள் அழைத்து செல்லவில்லை என அடித்து கூறினர்.

அதனை தொடர்ந்து அந்த 4 மாணவர்கள் குறித்து பள்ளி தலைமை ஆசிரியரிடம் விசாரித்த போது அவர்கள் 4 பேரும் அடிக்கடி பள்ளிக்கு வராமல் ஊர் சுற்றுபவர்கள் அவர்கள் தீய பழக்கங்கள் உள்ளவர்கள் என தெரிவித்தார்.

இதற்கிடையே தினேசின் தந்தைக்கு, 4 மாணவர்கள் மீதும் சந்தேகம் ஏற்பட்டது.

இதனால் கடந்த மாதம் 14-ந் தேதி மாணவர் சந்திரனின் வீட்டிற்கு சென்ற தினேசின் தந்தை உங்களுடைய மகனும் அவனது நண்பர்களும் சேர்ந்து எனது மகனைகொலை செய்திருக்கலாம் என சந்தேகிக்கிறேன். எனவே நிதிமன்றத்தில் ஆட் கொணர்வு மனு தாக்கல் செய்ய உள்ளேன் என கூறி விட்டு வந்தார்.

இந்நிலையில் கடந்த 18-ந்தேதி காலையில் தினேசின் தந்தை செல்போன் எண்ணிற்கு தொடர்பு கொண்ட அந்த 4 மாணவர்களில் ஒருவரான ராஜா உங்களுடைய மகன் கரம்பத்தூர் பகுதியில் பார்த்ததாக கூறிவிட்டு போனை கட் செய்துள்ளான்.

இதையடுத்து அங்கு சென்று தேடி பார்த்த போது தினேஷ் ஆவூர் சாலையில் உள்ள பாலத்தில் சுய நினைவை இழந்தபடி மயக்கத்தில் இருந்தான். அவனது உடலில் பல இடங்களில் காயங்கள் இருந்தன.

தினேசை மீட்டு அவனுடைய தந்தை விசாரித்தார். அப்போது சம்பவத்தன்று தனது நண்பர்கள் 4 பேரும் தன்னை பள்ளியை விட்டு வெளியே வா. முக்கியமான இடத்திற்கு அழைத்து செல்கிறோம் என வலுக்கட்டாயமாக அழைத்து சென்றனர்.

பின்னர் 4 பேரும் என்னை கொடிமரத்து மூலை அருகே உள்ள டீக்கடைக்கு அழைத்து சென்றனர்.

அங்கு அவர்கள் கும்பகோணத்தை சேர்ந்த மணி என்பவரிடம் தன்னை அறிமுகம் செய்தனர். அவர்கள் தனியாக சென்று பேசினர். மணி அவர்கள் 4 பேருக்கும் பணம் கொடுத்தார். அதன்பின்னர் தனக்கு டீ வாங்கி கொடுத்தனர். அதன்பிறகு நான் மயக்கம் அடைந்துவிட்டேன். முழித்து பார்த்த போது திருப்பூரில் ஒரு அறையில் கிடந்தேன்.

அங்கிருந்த சிலர் தனக்கு சாப்பாடு போட்டு அடித்து துன்புறுத்தி கொத்தடிமையாக வேலை வாங்கியதாக கூறியுள்ளான்.

இதையடுத்த தினேசின் தந்தை அந்த 4 மாணவர்களிடமும் சென்று இதுகுறித்து மிரட்டி விசாரித்த போது தங்களுக்கும் இதுபோன்ற மாணவர்களை கடத்தும் கும்பலுக்கும் தொடர்பு இருப்பதாகவும் அவர்கள் நாங்கள் அழைத்து விடும் மாணவர்களுக்கு ஏற்றாற்போல் பணம் தருவார்கள் என கூறியுள்ளனர். நாங்கள் இதுபோன்று இனிமேல் செய்யமாட்டோம். தங்களை போலீசில் மாட்டி விட வேண்டாம் என கெஞ்சியுள்ளனர்.

பள்ளி மாணவர்கள் என்பதால் தினேசின் தந்தை அவர்களை கண்டித்து விட்டு சென்றுவிட்டார்.

கோவை:

கோவை சாய்பாபா காலனி சப்-இன்ஸ்பெக்டர் கஜேந்திரன் மற்றும் போலீசார் தடாகம் சாலையில் வாகன சோதனையில் ஈடுபட்டு இருந்தனர்.

அப்போது சந்தேகத்துக்கு இடமான வகையில் 2 பேர் மோட்டார் சைக்கிளில் வந்தனர். அவர்களை பிடித்து விசாரணை நடத்தினார்கள். அவர்கள் உத்தரபிரதேசத்தை சேர்ந்த முகமது ரசீது (34), அரியானா மாநிலத்தை சேர்ந்த முகமது சமீர் (33) என்பதும் நூதன முறையில் பணம் பறிக்கும் சம்பவத்தில் ஈடுபடுபவர்கள் என்பதும் தெரிய வந்தது. இவர்கள் ஜவுளி வியாபாரி போலவும், செல்போன் விற்பனை செய்பவர்கள் போலவும் நடித்து பணம் பறிப்பில் ஈடுபட்டுள்ளனர்.

இவர்கள் இருவரும் சில செல்போன்களை எடுத்து கொண்டு குறிப்பிட்ட இடங்களுக்கு செல்வதும், அங்குள்ள வாலிபர்களிடம் குறைந்த விலைக்கு செல்போன் தருவதாக கூறி அதனை வாங்கும் வாலிபர்களிடம் பணத்தை பெற்று கொண்டு செல்போனை மடித்து கொடுக்கும் போது செல்போன் மூடியை மட்டும் கொடுத்து நூதன முறையில் பணம் பறித்துள்ளனர்.

அவர்கள் இருவரையும் போலீசார் கைது செய்தனர். அவர்களிடமிருந்து ஒரு மோட்டார் சைக்கிள் மற்றும் செல்போன்கள் பறிமுதல் செய்யப்பட்டது.